Accueil

1% DE LA POPULATION SUÉDOISE EST IRAKIENNE

Par Maxette Olsson

Prèmyé-minis Lasyèd Fredrik Reinfeldt ki an adoumanman épi Barack Obama, konmansé pa di a ICI : «Yònn pousan (1%) dè popilasyon Lasyèd Irakyen» Kivédi an diplomasi syédwa «Nou pa bonn´ a zòt.»

Pou konpwann, fò sav ki tini 9 000 000 moun tout´ Lasyèd pou 449 964 kilomèt karé. La kini plis moun sé Gran-Èstokòlm : 1 252 000 moun. É conté (comté) a Èstokòlm li tini 1 949 516 moun.
17 000 polis toupatou Èstokòlm yè é jòdi-la véyatif-véyatif davwa Ban Ki-Moon sèkrétè jénéral a NasyonZini, minis a péyi dèwó Zétazini Condoleeza Rice, Nouri al-Maliki prèmyé minis a Irak é sis minis-ay, plis ankò 500 délégyé dè 100 péyi isi Upplands Väsby, on banlyé Èstòkòlm, pou on déba yo ka kriyé International Compact with Iraq (ICI): on sendika (partenariat) a NasyonZini é gouvèlman a Irak.

Sé prèmyé fwa on granzafè konsa fèt Lasyèd. Mé an tann di ki BBC, CNN, télévizyon alman é fwansé pa té la menm. An pa té la non plis. An pa politisyen. An ka makyé sa an tann.

Wè ! Pwès tout´ péyi sanblé pou ba Irak gaz, pou yo tini pa a pétrol a yo é fè tout´réfijyé Irakyen woutouné an péyi a yo. Silon ministè a dèwò Lasyèd Carl Bildt, tini 2 000 000 Irakyen réfijyé an péyi a yo menm , 2 000 000 fwontyé a Irak (kon Siri é Jòdani) é 2 000 000 dèwò. Yanki 73 000 ja woutouné é sé dé grangrèk kon dòktè, avoka... moun konsa.

Tann sa ! Alèkilé Irak sendika a OECD (Organisation de coopération et de développement économiques) : sé 19 péyi-la ki pli fò endistryèl -la. Club de Paris yo ka kriyé yo. Alòspoudonk OECD pwomèt Irak défasé tout´krédi ay 80-100 procent. Sa fè-an chonjé on piblisité a 1968 “En France on a pas de pétrol mais on a des idées.” Sésa mari an mwen ka di mwen lè an touvé on débouya pa péché. Bon. Chèf a NasyonZini li apwézan, i pwomèt tiré sanksyon-la ki ka pann´ asi tèt a Irak dépi tan a Saddam. Kivédi ban mwen : “Si-w ba tout ti moun an mwen adan sa-w tini, an péké ba-w kou.” Man Condoleeza répliké ki apa lajan Irak bizwen sé tèknik i bizwen. Savlédi “ An péké ba-w lajan an mwen, vo myé ou ba timoun an mwen travay. ” Mé adantousa 300 anpwayé lanbassad vépa woutouné Irak. Poukibiten ? Sa? An pa sav.

Tout´moun sav ki Irak sé on péyi rich. Yo ka pwodui jòdi-la 2, 6 milyon bari pétwòl chak jou é Ali ali-Dabbagh palè a gouvèlman Irak di ki si yo réparé enfrastrikti a yo, yo ké pé pwodui 4-5 milyon bari chak jou. Kon pétwòl chè-la, sépoudi koman péyi-la richa, kifè yo tout ochan. Mé kèsyon-la sé koman yo ké sèvi épi lajan-la pas´ konmkwè ki lahan anbatab ka fè tilili. Alò silon sa an konpwann, yo bizwen Irak sèvi é lajan lasa pou fè tout Irakyen rantré a kaz a yo. Mi déba ! Mé chèf à misyon a NasyonZini Staffan Mistura, on syédwa-italyen di konsa ki Irak pa paré pou tout réfijyé woutouné, Irak pito bizwen koudmen a dòt péyi pou gyéri péyi-la.
Finaldikont a Ban Ki-Moon antfitéfant sé : ”Hopp.” “Èspwa.” Ansav ki fanm tonbé pa janmé dézèspéré davwa an sé kréyòl, mé pou sèkrétè a NasyonZini, an pa sav sa-y vlé di pala. An pépa konpwann tout´biten. Ka-w vlé fè ?

Adantousa, òganizasyon a Fanm-Irak pani dwa asisté a konférens-la. Lanné pwochènn yo kay fè sa rèbèlot Bagdad.
Bagdad ! Mwen enmé non la-sa davwa i toujou ka fè an chonjé on flim an vwè siléma a katrè : Le voleur de Bagdad.

Bon. Yo ka di tout´ biten politik, mé pa mélé mwen siouplé ! Anpaka fè politik pas an paka konpwann lojik a politisyen. Anka anki ba zòt fré-la kon an tann li.

{{Maksèt Olsòn}}

Rosenbad, Le siège du Premier Ministre et Riksdagen, Le Parlement à
Stockholm

Photo : Maxette Olsson (cliquez pour agrandir)

Pages