Accueil
Kréyolad 798

Anri…tret !

Jid
Anri…tret !

Jédi pasé Anri désann anvil, mé i pa alé pabò Lamézon lé sendika. Sa ka fè si mwa misié antré laritret, é magré sé té an militan o konba, misié pa kontinié défilé épi sé kanmarad li-a. Lè misiè rivé Tèsenvil, i fè chimen kochi dot di chimen kòsiè, mé pèsonn pa sav la misié pasé.

Ni moun ki pa tjansé pou bat djol san dan yo. Ni yonn ki di konsa:

— Anri mèyè alé pran an fé dan an privé !

Anlot di bouch anba bra an ti-manniè an bèn:

— Man pito kwè i alé wè an panyol i té ka lonviyé dépi yonndé tan. Manzel prézantab anlè tab kon anba tab!

Anlo dot di tou:

— An sendikalis ki té si o konba, yo ypito kwè misié sé an tret laklas ouvriyè!

Antouléka kom Anri ja laritret, daprè’y Mano Makawon pé ké sa touché pansion’y-la. Sa i pa sav, akondi pawol-la: pli ta pli tris!

Ni anlo dot sendikalis ki pa ka moli. Yo ja di mardi prochen yo ké bandé chenn lan pli red épi anlot débréyaj ankò pli danjéré ki jédi pasé.

Sé militan-tala telman pa ka moli, yo prévwa soutni TELETHON pas wouchach bizwen lajan pou konbat maladi ki ra.

Lè ou sé an militan, menmsi ou laritret fok pa fè kon Anri. Fok pa kayé mé kontinié lalit jikatan ou rivé trapé an rézilta.

Adjilbè limenm ki an militan fini rivé, i chwézi alé MANA (Marché Agricole du Nord Atlantique). MANA ka mantjé an lanné pou i trapé ventan. Ann atandan i ka vann tout kalté yanm: yanm sasa, yanm poul, yanm jòn, Bokodji, djanpal… Jik té ni an yanm tibren ra, koko bourik yo ka kriyé tou, pòtanlè (i pa ka pousé anba tè). Menmsi le 24 lwen, Adjilbè pofité fè an povizion pou i pé sa manjé yanm sasa épi pwa-dangol. Pas pa ni pli bon manjé pou akonpanié viann kochon wousi-a, lè nwel rivé.

Jid

Bel poveb kréyol 538

«Sé kod yanm ka maré yanm».

Photo: Pwa-dangol. F.Palli.

Pages