Konpè makak épi rev-li
Konpè makak té ka rété an manman bwa épi madanm-li épi ich-li.
Zafè-a té red koté yo. Makak té ka planté an ti jaden manjé épi, délè, man Makak té ka chajé an tré asou tet-li pou i alé vann fwitaj épi grenn bwa. Pou maléré, yo té maléré. Yo pa té ni an bon kouch pou yo té dòmi ; sé té vié kabann makak té fè li menm é sé yich-la té ka anni vlopé kò-yo adan rad kabann. Pa menm palé bel lenj : tout moun-la té an ranyon.
On jou, Makak té rété ka koupé kanpech pou fè chabon ; i rantré an kay-li pi krazé ki an baton payay charet pasé asi’y. I halé an sek épi i alé dòmi. Makak té ka révé i touvé an koko lajan ; i vini wa. Li ek fanmiy-li, yo té ka rété adan an gran bidim kay hotéba. Yo té ka manjé ada zasiet poslenn. Yo té ni dé kalité bel lenj ! Adan tout kay-la bel bagay ka fè chien. Makak anlè !
Dévèn pou’y sonmey-la koupé fap ! I ka gadé alantou’y : menm lanmizè-a, menm vié kabann-la, menm lodè lanmori a an kay-la. I di i pé ké pwan sa kon sa. I ka alé touvé Bondié. I pwan kouri. Lè i rivé kay Bondié, i té ésouflé, ésouflé.
— Bonjou Bondié !
— Bonjou Makak ! Ki manniè sa yé koté’w ?
— Han ! Bagay-la pa bon an.
— Men sa ki rivé’w kon sa ?
— Ében Bondié, poutji rev pa ka vwé ? An révé an kalité bel ti rev ! Lè mwen lévé, kè-mwen fè mwen mal. Tanprisouplé Bondié !
An ka mandé’w an ti favè. An té ké lé, lè mwen révé an bagay i fè poubon.
Bondié réponn :
— Han ! Sé pou sa ou kolè-a an ? Ében pa otjipé kò’w, pa lapenn fè mové san. Déviré an kay-ou ou ké wè, tou sa ou ké révé ké fet pou bon.
— Mèsi Bondié !
Lè labadjou kasé, Makak mété’y annaks pou i té dòmi alez kò’y. Tout moun pé an kay-la misié Makak bizwen dòmi !
É ! É ! Douvanjou, sa i ka révé ? Pou uitè, i té ja mò. I lévé an sikso. I pa menm ni tan woté lenj dòmi’y anlè’y. I mété kouri atè. Lè i rivé owa kay Bondié, otan an pié mòn-la i hélé :
— Misié Bondié, misié Bondié ô ! Pou bagay yè a, pa lapenn anko !
Bondié menm ka mò ri :
— Men sa ki ni an ? Sa ka boulvèsé’w kon sa.
— Papa Bondié, mwen ka respekté’w. Tou sa ou fè bien bon. Mé pa fè rev vwé menm menm menm ! An révé mwen té pou mò jòdi-a a uitè. Alos, an sel bagay an pé di’w : « Annou pa ka ! »
Bondié rété ka jwé an bab-li épi i di :
— Dakò ! Rev ka rété rev, ou pé ké mò.
Men lapè boulvèsé Konpè Makak. I foukan. Lè i rivé an kay-li, i mété’y ka kalkilé, é i rivé admet : sé pa pan-an kalité monté ek désann ki ké fè’y sòti anba soley cho a.
Bout.