An fwa ankò, nou blijé mandé kò-nou ki sa sondè, jounalis, dékatiyè politik kisasayésa...ka sèvi pis, lè nou ka gadé, pa ni yonn adan yo ki té prévwè ki chen té ké pisé anlè Nicolas SARKOZY adan éleksion pou sé primè Ladwet la ki woulé dimanch-tala. Tout sé swédizan gran-grek tala té kabéché red pou espitjé nou ki té ni anni dé kandida ki té sérié. Dé kandida ki té ni chans ay adan déziem lawonn sé éleksion primè tala : Nicolas SARKOZY ek Alain JUPPE.
Ki sa nou wè ?
Nou wè ki SARKOZY pwan an dal pis i sòti twaziem épi an vié ti 21% vwa ek ki JUPPE pa fè sitelman pli bien (26%), menmsi i kalifié pou dézienm lawonn-lan. Nou ka rimatjé tou ki François FILLON, ki pa yonn adan sé gran dékatiyè politik la pa té wè ka janbé primié lawonn-lan, rivé primié-douvan épi an bidim rézilta : 44%. Kon bagay-la ka woulé la-a, i ka sanm konsidiré sé li, JUPPE, ki ké genyen dézienm lawonn-lan abo, adan lapolitik, ayen pa janmen sèten kon tout moun plis ki sav.
Ni omwens an bon bagay adan lakonmédi primè tala : sé zafè sé Fwansé-a fouté SARKOZY an razié. Yo ba misié biyé-pa-lapenn li ! Nou pa ka bliyé ki isalop-tala té déklaré i té ké "karchérizé" sé banlié-a éti Neg ek Arab ka viv. Nou pa ka bliyé ki misié té atatjé la-Libi pou maté gouvelman kolonel KADHAFI ek i té fè tjwé'y abo KADHAFI té vréyé an bon enpé milion dola anlè'y pou SARKOZY té pé fè kanpay élektoral. Nou pa ka bliyé ki misié migannen adan an bidim eskandal yo ka kriyé BIGMALION éti madrag té fet adan kontabilité kanpay élektoral li jistiman. Nou pa ka bliyé soutou ki, adan an vizit ofisiel i té ka fè atè Sénégal, i té déklaré ki "Neg poko rantré adan listwè".
Enben, SARKO, monfi, ou sòti di listwè avan wou menm ou fè tan antré andidan'y !...
Bwet-a-mo :
Abo : bien que.
Biyé-pa-lapenn : lettre de licenciement immédiat.
Dal : défaite cuisante.
Dékatiyè : analyste.
Gran-grek : intellectuel.
Kabéché : cogiter.
Kisasayésa : etc.
Lawonn : tour.
Madrag : magouille.
Migannen : (se) mélanger.
Tou : aussi.