Accueil

Dirigonflis…. égal pat égal mòdan !

Hector POULLET
Dirigonflis…. égal pat égal mòdan !

Tini déserten moun, yo toujou ka chèché-touvé on plas pou yo rivé sizé la diri-la ka gonflé. Yo pa ni pon kalité òwgèy, dépi ni zo pou yo sousé, mi yo prèmyé douvan. Kèlanswa tala ka séparé manjé-la, yo toujou alantou tab-la. Yo mansousyé ou mandé yo sòti-yo agòch pou yo mété-yo adwèt oswa sòti-yo adwèt mété-yo agòch, a pa zafè a-yo, tousa yo vlé sé trapé on pa adan diri-dou la. Epi a pa tout, yo vlé manjé-la séparé égal pat, égal mòdan. Kifè moun ka kriyé-yo dirigonflis.

Mètalafè poko menm mété pyé adan lasal a manjé-la, yo ja ka sanblé, yo ka lagyé tout rèstan kannari yo té ja ni ka niché pou yo prézanté :

  • Mi mwen, sé mwen ki mwen, an vlé pli gwo mòdan-la !
  • Kisiswa-kinanswa, fo ou pwan on tiké kon tout moun !
  • Ki zafè tiké ! Sakrifyé an ka sakrifyé mwen pou rédé-zòt fè péyi-la vansé !

Mètalafè pa menm ka lévé-y digad.

Konpè Diyojèn on vyé zanmi filozòf ka gadé sa ka anni soukré tèt a-y : nonm ka mandé zo pasé chyen !

Pages