{ {{Voici un savoureux petit conte en créole guadeloupéen par Jean S. Sahaï. A noter, Montserrat est une des très rares îles de la Caraïbe à être restée britannique, et donc à utiliser des dollars BWI. Visible, avec son volcan fumerollant, depuis Deshaies en Guadeloupe, la petite île qui n'est habitable que de moitié n'en est pas moins le cadet du souci de la franco-faune...}} }
DOLA BIWI
Manzè Latinèt Lakonplent-la biwzen alé pasé détwa jou Monsérat pou mété anglé a-y doubout titak.
I kay labank on vandrèdi apré-midi pou chanjé on ti paké éwo an dola-biwi. I ja vwè maké an fransanti-la, pou on éwo, sé 3 virgil 50 dola-biwi i kay trapé.
Toupannan'y ka fè laké an labank-la, Latinèt ka vwè on papa gwo kontè kanpé douvan'y ka maké 3.53. On ti moman apré, i ka vwè to-la rimonté a 3.56.
On dot ti moman ka pasé, é rivé tou a'y, Lakonplent ka mété ti paké éwo-la anba vit a giché-la. Madanm-la ka di'y konsa todchanj-la sé 3 dola-biwi 39, pou on éwo.
Lakonplent ka pwan souf a'y, i ka pwenté on gwo dwet bagé si kontè-la, é i ka réponn madanm a giché-la :
- Mé kouman fè ou ka di mwen sé yenki 3 dola-biwi 39 tousèl pou on éwo, on? Gwo kontè-la sòti téka maké 4.06, òòò-ò !
- Mais c'est la pendule, Madame, il est 4 heures passées de... 7 minutes déjà, et nous allons fermer ! Repassez lundi matin !
Mi sé konsa nou ka vwè sa nou anvi vwè, nou ka pri, é nou pa'a kontan lè yo ka di nou sé révé nou té ka révé.
Nou tout sé dé Latinèt Lakonplent ! Souvantfwa, réalité a lavi-la ka bien diféran dè ti rev annou...
{{J.S. S.}}