Kifè, i touvé ledjim ek tou sa i té bizwen pou fè an bon soup-zabitan kon dabitid ek i péyé Man Lili-pòté-mannev.
Men, avan Dézodez chapé, Man Lili-pòté-mannev di'y kon sa:
" Man ni milon tou ! Ga ki manniè yo bel ! "
Dézodez réponn li :
"Kidonk ou sav man enmen sa toubanman ! Alos, ba mwen bidim milon-tala ! I ka sanm mwen i sikré kité sikré ka alé. Asirépapetet, sé an tété-dwet ki la ! "
Man Lili-pòté-mannev réponn-i kon sa : "
" Ou ni rézon, men genyen an piti tou. Gadé yo ! Yo bon dann ! "
Adan menm balan-an, Dézodez anni ba'y an kout zié intènasional épi i di'y kon sa :
" Man ka genyen anni gwo-a pas sé-tala two piti ! Ki sa man key pé fè épi sa ? Yo ka sanm zoranj ek yo pa dot ni pies gou ! "
Man Lili-pòté-mannev mété an ti milon an saché'y-la kanmenm ek apré sa i di'y kon sa :
"Bon, man ka ofè'w ti-milon tala ek lè ou key viré wè mwen an lot jou, ou key rakonté mwen ki manniè ou touvé'y. "
Men, Dézodez pa fè ni yonn ni dé ek i anni ri malérez-la épi tout moun gadé'y. Apré sa, i di'y kon sa :
"Bon, Man Lili-pòté-mannev, mèsi, men man sav man déchajé'w épi ti milon-tala pas ou sav bien ou pa té ni pies chans van an sel kon sa jodi-a. Krakrakra !..Bon, man tiré pié-mwen, man key viré wè'w lasimenn pwochenn. A an lot soley, Mafi. Tjenbé red ! "
Dézodez alé batjé abò bis-la pou viré-monté bò lakay-li. Men, dépi moman-tala, adan chalè diz-è bis-la, i koumansé pran an bon lodè milon ki té ka sòti monté adan kaba'y-la.
Kifè, lè i rivé lakay-li, i di kò'y kon sa :
"Ti milon-an, man key anni nannan'w atjolman konsidiré ou té an zoranj. Sa ou ka di ? "
Ki-di-ki-fet, i pran kouto filé'y ek i anni fann li an dé pou an dé. Apré sa, i koupé an ti moso épi i mété'y anba dan'y.
Kidonk, i ouvè zié'y épi i di:
"Ébé Bondié laviej Mari ! Kouman, ti milon-an, ou sé sik-sosé-dan-miel ! Man pa janmen manjé an milon obidjoul kon sa ! Mi man za fini manjé'w. Ba mwen viré-désann chaché dot an lanmen man Man Lili-pòté-pannev avan i pa rété pies "
Ki-di-ki-fet, i dévié bò chimen-an ek i trapé an istop pou viré-désann an vil.
Lè Dézodez rivé an marché-a, i anni tiré soulié'y an pié'y épi i mech kouri pou rivé wotè Man Lili-pòté-mannev.
Abo i té résouflé, i di'y kon sa bien fò pou tout moun tann :
"Padon, padon, Man Lili-pòté-mannev ! Man pé jis ba'w senk éwo pou ti milon-an ou ban mwen-an talè-a ! Man pa té sav ou té ka vann sé kalté trézò-tala pa isia. Tanpri-souplé, vann sé set ti milon-an ou rété a ba mwen ! Dayè, mi liméwo powtab-mwen, lè ou trapé dot kon sa, anni sonnen mwen. Man key anni achté tjenz an sel kou a an lanmen'w mafi ! "
Anfinaldikont, dépi jou-tala, Dézodez aprann fok toujou gouté an milon avan tiré méprizasion ba'y davwè sé anni lè ou ouvè'y ek mòdé'y, ou ka rivé sav ki sa i ni an fondok bouden'y an plis di sé grenn-li a.
Mi bel lison dann !