Accueil

JÉNÉRAL KÒDONIÉ

JÉNÉRAL KÒDONIÉ

 

   Té tini on kòdonié ki té telman fennyan, i pa té vlé travay.

   On jou i fè on ti palet é i mété’y ka tjwé mouch. I pran san a mouch-la, i mété’y asi lenj a’y é di :

   – Mwen tjwé swasant sòlda san konté lé blésé é sa mwen pa menm vwè.  

   Tout koté i pasé, i té ka rakonté sa. Wa-la tann sa. I té ni on batay pou’y fè, mè i pa té ni solda. I fè kriyé kòdonié-la.

   Kòdonié-la di :

   – Mwen ké fè batay-la pou’w. Mwen pa bizwen solda !

   Wa-la ba’y on chouval a dé brid ; yonn pou aresté, lot la pou alé. Chouval pran kouri.  I té ka kouri telman vit, kòdonié-la pa té tini tan pou kenbé brid aresté la.

   I té tini on drapo an men a’y.

   Lè i rivé koté on simitiè, i té telman pè, i kenbé on kwa.

   Kwa-la raché.

   Lè i rivé si lè chan de batay èvè kwa-la an men a’y, sé sòlda-la mété yo ajounou. Yo konprann sé Bondié ki ka vini.

   Kòdonié-la pran drapo a sé sòlda-la, é i rapòté’y ba wa-la.

   I di’y kon sa : 

   – Lè ou tini on piti batay konsa pou fè, pa lapenn kriyé mwen !

     Otograf GEREC-F II

     CATALAN Sonia, COMBELLES Henri avec la collaboration de Lilia ABELA, Tim tim bois sec !, Contes créoles 2 niveau, Paris, les Éditions D

Pages