Tonèr di sòr !
To pa pran lodè Mové Tig ki ja tanbé asou to,
Ké balan ladestiné ka roulé rondanron dépi laro Saut Fracas !
A pa oun ti lapli anba labay ki ka fè lapoussignen pa bò lanmè mo kolèg,
A pa oun ti koudbwa Gonfolo di lavi ki frapé to lala Chon,
A pa oun ti lapli zédjwi an to zyé ka piké to kanno asou larout' Lésé Dédé non plis !
Sé lékrazman pwisans' jijman dernyé a ki pri asou to palto, san manman !
Sé lafors Mèt Gran danbwa disan bondisan ka sirviv' pa lajénès so zong yé !
Sé l'étoufman ké so machwè rach' ka livré to l'éternel kalité somey Papà !
Tonèr di sòr !
Koulèv dlo mo frè Wayana kaplé Anaconda, ka pousé, menm frenen, balan flèv a,
Sa la, to pa té wèl non plis,
Poutan so vitès ka filé koun rèv zéklè soupayé fléché à dlo,
Parmi tout chèf najèr sa Nasyon a gen,
Li sa Mèt dilo gran douvan Mouché Kaïman a ki pa dernyé ka fè chin an péyi a,
Yé toulédé ka briga pou kontrol basen a douvan Mouché Aïmara,
Ki pou li-menm,
Pa gen kata-kata ké so dan chyen, sé mové travay sourjen lopital i ka fè !
Tonèr di sòr !