An ti-pawol ka di : dépi ou bouché ou pou pè kòn » sé bouché isi a pa kontan pies, pas viann-yo pa ka vann.
Pou moun té sa tann, yo bouché labatwa, yo fè opérasion mòlòkòy, mé ni an boug ki té ja bizwen likidé an ti-toro, i pofité débité’y pou fè touvènan.
Ni an bouché ki di :
- lavenir-mwen bouché man oblijé bouché lawout !
Kantapou madanm-li, i di’y :
- Man pa konnet zafè’w, mé fok ou pòté fili-miyon ba mwen. Man ni an zafè ti-bouché yo mandé mwen dan an batenm, é man ni bizwen viann !
Labatwa fèmen sé jou-tala, bouché klandesten ka fè siwawa. Yo ka jik propozé’w viann a domisil. Pa bizwen alé, ni o marché pa menm palé libsèvis réyon labouchri. Yo pé menm mété’y an bouch-ou si ou lé.
Man konnet yonndé moun ki bien kontan bagay-tala. Pas yo pèdi labitid alé genyen viann labouchri. Yo pa fè acha, sa ki té ni bon dacha pa alé pies koté. Yo fè kon an boug Sentàn, i di i pou dévlopman dirab. Dépi sé pou rab, I dakò. Misié sé an agoulou granfal, an endiskré ek an voras dépi i ni viann.
Misié pa pou sav si sé viann touvènan, klandesten oben viann débouya. Dépi i tjwit i ka foulé, i ka bouché zié’y ek i ka manjé ti-bouché pas i pa rayi amizgel.
Adan zafè dévlopman dirab-la, pa koté Sentàn, yo ka défann moun kolé krab. Yo lé prézervé la resous. Mé ni anlo moun ki désidé baré, bouché, opozé moun alé dan lisid pou chaché krab.
Yo baré tout lawout épi ratiè-yo, mé sé pa pou kolé rat. Yo bizwen krab pou Pak. Yo alé wè Kolektif-la pas ni an zafè krab Madagaska ki pli gro ki ta isi-a, ki ja propté nétwayé é ki ni plis lachè é ki mwen chè.
Yo mènasé sé libsèvis pou mandé mété krab Matinik.
Sel poblèm, sé libsèvis selman ki ka vann sa, é pa sé moun-an ka kolé krab-la.
Es lavèni-yo pa bouché ?
Jid