Accueil

Laliwondaj 10 : Mari-wont, Jandab é sé Gran Vòlè-la

Hector POULLET

Mwen ay pwonmlé an hazyé

Bòkaz a Manzè-Mari

An tann-li té ka babyé

Sa i di pa fè-mwen ri.

 

I té ka di, kouté-li :

« Twòp  madrag an péyi-la

Jandab ka fè tilili

Vòlè mansousyé yo la ! »

 

« Ni tiboug ka fè-lajòl

Lè yo pwan on zakari

Gran-vòlè fè gran-lékòl

Yo p’a  drivé an lari !

 

Yo jis rivé ka fè-wòl [2]

Goumé pou péyi a-yo

Olagya ! Anni pawòl

Yo la pou plen pòch a-yo ! »

 

Mari-wont ka fè kòlè

Lè’w ka di-y jandab ka vin

I ka di : « Jandab !  Vòlè !

Sé menm bèt é sé menm plim ! »

 

Mwen i té vini pwonmlé

An té la èstébékwè

An resté ka kalkilé

San sav sa pou mwen kwè !

 

Bay-lavwa   (/ Envoi )

Ki  yo vlé, ki yo pa vlé

Moun  boufi é makakri

Yo ké lévé gawoulé

Gran Vòlè kay fini ri !




[1] Mari-wont Matinik sé Manzè-Mari Gwadloup : Mimosa pudica.

[2] Fè-wòl : faire semblant.

 

Pages