Van vini Van vini… Se konsa vwa m ap dechire Dènye vwal syèl la Se konsa kap mwen ap fofile moute Kap mwen Mande m fil Se debobine map debobine plòt fisèl mwen Sezon karèm pote van Sezon karèm, mwen konn chita anba pyebwa Pou m dèvèse kap mwen Kap an echèl Kap an papiyon Kap janm debwa Kap pòtre lakansyèl Anvan solèy fèmen zye l Chante m ale Chante m Pote kap lòt bò ravin'n Lòt bò barikad wòch galèt Lòt bò miray-pèlen Miray moso boutèy Miray pikan kwenna Kap mwen anlè Anlè anlè Anlè anlè nèt ! Kap mwen anlè. Zafè fil kouran Zafè poto elektrik zafè kout zèklè Se kap mwen kap moute Se chante m ap chante Pou kap mwen Moute sou zepòl van Pou kap mwen Deplòye tout zèl li yo Talè konsa se nouvèl m ap voye Al jwenn kap mwen Atò jilèt m anvi Plake nan ke kap la Pou sizoka lòt kap Kap deklare m lagè Se van kap soufle Se rozo kap balanse Van gen tan Ap soufle nan banbou Kap yo deplòye anlè a Tankou bann rara Kap pa m se majò jon Se pa ti kras ekzibisyon Kap mwen moute Li plonje pou'l bay kout tèt Mwen redrese l Kap mwen moute moute Map bay kap mwen fil M ap ba l fil Jous lò m sou baton Map ba'l fil Jous solèy fèmen papòt li M ap moute kap mwen Jous van sispann vante Jous van pèdi fòs li Van vini Van vini… Van vini Van vini… Valè chapo m Ou fè m pèdi deja Valè pousyè ou soufle Nan kalalou zye m Valè zèl papiyon Ou jete nan sòs pwa frans mwen Van van zanmi mwen Mwen lage de gidon Nan kò ou M ap frape pòt ou Sekrè van se chante m Sekrè van se mizik Fèy pyebwa ou Ak bri vwal batiman Nan mitan vag lanmè Se pòtre van nou Lò nou vini dayiva Lò van soufle twòp Anvan n pale ak lanmè Se pou van mwen chante Se direksyon van mwen chache Chante zile m Konnen sekrè van Mezi pou kap mwen Moute pi wo nan syèl la Mwen reklame valè van Valè baboukèt kap mwen Kapab sipòte tèt drèt Se sèl lò m ap moute kap Mwen jwe konsa ak van Van se kanmarad mwen Van ak mwen Se Kòkòt ak Figaro Nou se fil ak kap papye fen Nou se fisèl ak grandou Nou san lanvè ak landwat Souple van Vante vante ankò Bèl kap an echèl mwen Moute moute Kap mwen moute Li moute pi wo Pase ti pye zoranj Kap moute moute Kap mwen moute Pi wo pi wo Pase mèt minwi Kap mwen moute Pi wo pi wo Pase Maryela Sou tèt poto Sanfil lan Kap moute moute Olye pou ta siapann vante Ou mèt tounen siklòn Nan gwo mwa septanm Fetay kay mwen P ap souke Zè l kap mwen Ap frape kad fasad van Chapo m sou tèt mwen Tonbe nan pla men m Van kap soufle… Ploton fil lage Lapatèt kap la sere Se van m ap rele Van pou kap Fann syèl la Van pou kap la Danse san rete Anba pla pye solèy Van an konnen pou l vante Prese prese van Kaye desen m Gen pòtre ke van Dèyè tèt mòn Kap mwen ak van Konn bay lodyans Olye n tann toujou Olye n chita ap Tande mizik van Pito n kase ti bwa Nan zorèy li Pito mwen fè chwichichwichi Ak zanmi mwen Van vini Van vini… Valè kanaval pousyè Ou konn leve Valè sant pafen Ou konn simaye Valè sant zoranj pouri Ou konn fè moute Valè vwal batiman Ou kase plizyè bout Valè kout kanno Ou konn tire Ansanm ak lanmè Valè chanje ou chanje Direksyon lò ou move Van se ou map tann Ou vinn ak siklòn Ou vinn ak lapli Ou vinn ak fèy tòl Ou vinn ak bout mi Ou vinn ak po flè Se ou map tann Van vini Ou di m onè M ap di ou respè Ou frape Mwen gen tan reponn Ou babye Mwen kapte l Ou bat zye ou Kap mwen vole Zèl kap mwen danse Zèl kap mwen salye'w Se kap m ap moute Se chante m ap chante Se ochan pou van Depi m ti kat kat Map aprann chante pou van Boulvari osinon nòdè Pa sa kroke vwa m Nan fetay nyaj yo Se van tout rele Se parantèz m ap louvri Si kap dechire Anba fil fè Si kap pèdi wout li Si kap la tounen Yon gwo kap an balon M ap ba l fil Ba l fil Ba l fil Jous li travèse frontyè Jous li travèse lanmè Jous li ale pi lwen Pase zwazo wap gade yo Van vini Van vini… Mwen ta pito tounen Bouki Avèk yon fè cho Pou m netwaye gòj mwen Van an wi! Se van m ap tann Sa pou m fè opalè Vwa m se eko Vwa m se mizik Tank m ap respire Tank van an soufle Tank m ap chante Tank kap ap moute Chak jou pou mwen Se vandredi Sen Chak mwa se karèm Chak fèy papye fen Se pou m kouvri kap Van pote rèl ban mwen Van an efase tablo Van louvri paj kaye Dikte! Dikte! M ap bay kap mwen fil M ap sifle Se konsa van an Te dikte m moute kap. Van vini M ap ba ou bonbon M ap fè ronn avèk ou M ap tounen kap papiyon M ap moute desann Ak yon sèl chante Van vini M a ba ou bonbon Lò van soufle Menm lakansyèl ou wè a Pèdi bonèt li Anwo tèt sous Se kap mwen Mwen ap gade Pòtre sèt koulè lakansyèl Van vini Van vini M a ba ou bonbon Kolonn timoun ap chante Tout branch bwa Ak grap zwazo Sèvi m òkès Lò m ap chante Van vini Van vini M a ba ou bonbon Se sifle m ap sifle Alo van Alo? Alo? Telefòn mwen ap sonnen nèt Alo van Van ap vini Menm jan lapli Konn vini brid soukou San syèl la pa gen tan Mare pli nan fwon l Van an vante M ap retire chapo m Pou m chante M ap trese kòd Pou m moute grandou M ap lote ti lo pa ti lo Plizyè ploton kòd pit Van vini Van vini M a ba ou bonbon Mwen te ka kenbe souf Pou m jwe twonpèt Ak dividal saksofòn Mwen ta ka jwe marèl Mwen ta sote kòd Ansanm ak sè m yo M ap sonde van M ap kapte van Van ou sou wout Pou l vini Kap mwen ap balanse Kap mwen ap chache ekilib Kap mwen san fòs kote Van sa wap tann Van vini Van vini M a ba ou bonbon Van an vle soufle Talè li soufle fò Annik li soufle konsa Mwen pèdi lonbray kap mwen Mwen kenbe fil kap mwen Mwen nan festival kap Mwen gen patisyon van Gaye sou fèy kap mwen Van.. Vini vini! Bonbon m sere pou ou… Van vini vini M a ba ou ochan 1 2 3 4 Van vini vini M a ba ou bonbon Tout vwa timoun yo Fonn ak vwa m Koral van an Monte sou rèl kriye Nan antèman Rèl babye bò lopital Rèl bò tèt sous Rèl ansyen zonbi Sous ranje gwo sèl Van vini Van vini Mwen ap ba ou ochan Ak bri zèl kap mwen Ak enstriman pa m Ak patisyon ou dikte nou Van vini Van vini Nou va ba ou bonbon Se dikte van konn Dikte direksyon l Sou dikte van Nou travay nou chante Se nou ak van Ki montre lakansyèl Sere bonèt li Twòp malfini Ap kouri pou trape Bonèt lakansyèl Twòp bèk fè Ap pase bò kap nou Van vini Van vini Otan pousyè ! Se ochan m ap bay van Sakad sou sakad Kap mwen ap pare Kap fè laviwon Dènyè tèt nwaj Van vini Van vini M'ap ba ou bonbon Zanmi soufle soufle Jous kòk monte bwa Jous solèy al Pwomenen byen lwen Van vante vante Kap mwen jwen viza Pou l travèse kanal divan Kap mwen gen pèmi vòl Kap nan pleday Ak pakèt avyon anlè a Kap mwen deploye Sèt koulè lakansyèl Klòch ap sonnen Kap mwen ap monte Latè nan laviwon dede Kap mwen mande fil Van vini Van vini vini M a ba ou bonbon Van vinni vini Anpil papiyon antre Nan kòtèj van an Frany bisiklèt ak rido pandye Mele nan won van an Nan vwayaj kap mwen Kap syèl la pase Tout boulin Men m la a Pran m si ou vle Se konsa m tounen Lombray van an Pèmisyon van Pou m tire kont Pèmisyon van pou m siye san sou pye medsiyen Van Vini Vini Vini…
Dominique Batraville