Accueil

OU KA ANVI SAV

Térez Léotin
OU KA ANVI SAV

   Ni dé avoka ki ni rad avoka anlè yo, ki pé jik fè’w mandé kòw ess sé pa an rad yo alé vòlè an koté, oben an rad yo sé prété yo. Lè ou ka tann plodari yo, pou pa di pawol initil yo a, ou ka mandé kòw, ess sé bien yo ki trapé diplonm avoka a, oben ess diplonm tala, ou pé anni alé genyen’y toupatou, dépi ou ni an lanmonné an lanmen’w ? 

   Ou ka mandé kòw tou, konbien lajan yo dwett ba boug la, si yo achté’y pou i palé kon i ka palé laa, adan télé gouvelman an ? Ou ka anvi sav. Kouman é ki koté nou za wè avoka plégnan mété tett li anba menm bonnett épi avoka ladéfans, si sé pa kon di Cabrimol an bizness ki ka fett la ?

   Kouman avoka plégnan an, kidonk Linivèsité, li ki sav  misié CEREGMIA ni wo konsa lajan Linivèsité i pran pou kòy, alé bliyé’y an fon poch li, lè i sav  ki li é sé konpliss li  a ni oliwon sett papa-chaj ka kouri asou kont yo, lè i sav sé pa tianmay ki la ka fè labonm épi lajan Linivèsité a, sé li avoka Linivèsité a limenm ki, olié i pran fètékoz pou travay la yo ka péyé’y la, sé li ki ka vini rakonté : « mésié sé nou-menm nou-menm, zott vòlè, annou fè lapé aprézan ».

   Ki koté nou yé a ? I la ka chaché lapé étila sé li ki pou pòté klèté lajistiss. É lajan an yo vòlè a, yo ka ba li’y, pou péyé’y ? Labé ka atann lajistiss, la lajistiss ni plass li. Pa misié, é i avoka Linivèsité a, kont sé  kotjen an, dapré’y. ! Ess sé pa koumansé Zaboka tala za ka koumansé di viré ba sé « konpè’y » la travay adan Linivèsité a, pou yo fini sisé si pé lajan an ki rété’y la ? 

   Pawol tala ki ka di : « Lavérité sé lwil, i ka toujou viré monté anlè », sé pa an pawol initil, pa pè.

                                                                                               Térèz LÉOTIN

Pages