Papa Nwèl sé papa kimoun kotésit ?
Si nou ka kouté sa yo vlé fè-nou kwè
Papa Nwèl té ké papa toutmoun
asi latè
Papa touséla, toulésèz i byen vlé
kriyé-y papa la.
Limenm a-y Papa-Nwèl i byen mansousyé
I ka rété an Laponi a Rovaniemi
On péyi
ola lèwvwè sé mwa désanm kon alè la
Solèy-la pa ka janmé lévé.
Pannan bon kèk jou ka fè nwè bon nwèsè-la
toulongalé.
Epi si ou ni pou ou déplasé
sé anni asi tréno ou pé rivé fè-y
(zòtout konnèt on tréno épa ?)
tèlman ni hokonsa nèj épi glas.
On péyi
ola ka fè sitèlman fwèt
kifè si ou pa abiyé jan Papa-Nwèl abiyé la
asiré ou sèten mò fwèt adan on batzyé.
Alòkifè
asiré Papa-Nwèl ka kontan vini kotésit
adan sé péyi an-nou la
pwan tibwen solèy, limyè é chalè.
Asiré i ka kontan pasé
adan sé sipèrmarché an-nou la
pou i ka tann :
« Pèti Papa Nowèl, kan ti désandra di syèl ! …»
Asiré Papa-Nwèl ka ri an bab a-y.
Épi moun ka achté
Ka achté toulongalé
ajékontinyé ka ranpli kadi a-yo
kat krédi ka chofé !
Pou aprésa yo ay di timoun a-yo :
sé kado “Papa Nowèl”wi !
“avè dé jouwé pa milyé !
Noubli pa mé pèti soulyé »
Papa Nwèl enmé péyi ola ni fanmi plen lajan
Pou yo achté, achté, achté lè tan-nwèl rivé.
I pa two enmé péyi ola ni twòp fanmi maléré.
Kifè sé maléré-la pa ka rivé kriyé-y papa nonplis.
An konnèt on péyi
ola moun enmé kriyé tout granmoun « papa »
Eben yo plis ki sav Papa Nwèl a pa papa-yo
Sa dwètèt pou sa yo ka kriyé-y
"Tonton-Nwèl ! »
Mé sa pé sé davwa adan sé péyi-lasa
Tonton sé sa ka konté plis pasé « papa ».