Accueil

Sé èstèné an ka èstèné

Max Rippon
Sé èstèné an ka èstèné

Lavi vin awad
Pas afòs fè
Nou fè lavi pèd sik

Di bonjou réponn mèsi
Vin ka kòché gòj kon zo a pwason-awmé
Si lavi pran gou a lalwé
Sé pas nou déléyé sòk a chari an nou an dlo-bwak
Apa lavi ki chanjé zépòl sé nou ki pèdi lawout
Sé nou ki pran mès rapòté an bwaskò
Sé nou ki pran dlo-mousach pou lèt
Nou égaré lawout avan tibrin ba mouch-a-fé pran lavòl
Ki fè nou pèd jan nou té ka véyé jès a niyaj an syèl
Nou ouvè lawonn pou antra pran lanmen
Antra mété nou kapon kon piskèt ajounou douvan békin
Nou maké krédi nou ka douwé asi sab cho
Lanmè dékwazé souyé tout mak a sab-mouvan
E nou pèdi lakat sèl an tounikèt
Yo wouzé nou an pisa koronpi
Yo anpizé nou kon wòb-a-kò plotonné an tré
Yo étenn difé si nou pou karo cho pa menm réisi goré nou
Nou vini kon pakèt hangnon chifonné ka ba lari chenn
Nou pyépoutèt
San savé si sé alé nou ka alé oben vini nou ka vini
Nou enki la sizé asi zaigo an nou ka véyé sòlèy fwadi
Annou kouvé sa ki ka rété
Pou fè sa ka rété woupran boujon
Fò nou pitité sa ki té bon
Pou sa ki té bon fè nou wouvini dòktè
Sé sa nou bizwen pou nou las viv alavaltori konsa
Péyi an mwen pèd zoban
An ka mandé menm on ti fannal limé pou nou touvé chimen
Fò nou di awa
Apa imité ké ba dlo-vésèl gou a vizou
Fò nou fouyé brèy a mang sèk
Pou konprann pawòl a zévan hontèz lésé ban nou
Fò nou tanmizé pousyè
Pou limiyè douvan-jou montré nou ki koté solèy ka lévé
Tan rivé pou chak tou a zéguiy touvé bon fil pou koud lavi
San pèd tan fofilé lavi...

Durocher 5 octobre 2019
Max Rippon

Pages