Accueil

SE LAJAN A SE KONTRIBIAB-LA KAY PEYE BA LISET !

SE LAJAN A SE KONTRIBIAB-LA KAY PEYE BA LISET !

   Déparfwa, nou pé mandé nou eskè nou pa tonbé si tet.

 Es sé vré ki latè ka touné won ? Es sé vré ki ni 365 jou adan on lanné ? Nou pé pozé nou on paket kèsion. Sé kon pou biten a lajan LISET dépansé pou péyé sé avoka a'y la é lézot dépans a jistis ? Nou ka apwann kè Konsey Kominotè Bastè la voté pou péyé yo !!! Kivlédi péyé yo èvè lajan a kontribiab, lajan a tout moun aloskè sé kontribiab-la pa ni hak a vwè adan sé madrag-lasa.
  Sé vré kè lalwa ka prévwa kè lè ou vwè ou mè, ou pwotéjé adan fonksion a'w é kè si ou trapé bab, kominoté-la ou adan'y la dwet lonjé men ba'w é ba'w on pal. Mé poblem-la sé dè sav ki bab ? Si sé on biten kè mè-la pa reskonsab, nou pé konpwann sa, mé a pa ka an LISET an pon jan. Lajistis rèkonet reskonsabilité a LISET piskè i ba'y 100.000 éwo amann é i enterdi'y prézanté'y adan pon éleksion pou tout larestan a vi a'y.
   Kidonk, adan ka-lasa, eskè sa nowmal ki sé konséyé kominotè a Bastè la voté pou péyé dépans a avoka a ansien minis a Jacques CHIRAC la ? Es sa moral ? Pep-la ka soufè anba chomaj é salè ki ridikil, mé sé li ankò ki pou met men a'y an poch a'y pou péyé konmédi a LISET !!!
   Konyéla, zot pé ké jen arété fè jé èvè tet a moun !...

Pages