Accueil

SENDRÒM KONDÉ-VENNDÉ : MARIZ DI ADYÉ !

Mi zafè!

Nou sòti pran on bel jiré-manman!

A 70 zan, Maryz Kondé di i ka chapé poudèbon. I ka viré viv Nouyòk pou la kilti, Pari pou santé a'y, Tinizi pou pitit a pitit a'y. Gwadloup? Sé pri fen bon prifen-la! Lakondé atann 22 zan yo bay on biten sèryé a fè. Avwala, tou sa yo fè'y fè, sé alé an ti lékol fè ti zélèv fè pajdékriti... Lè'w vwè Konsèy Général tann di Mariz tékay tiré larévérans an benn, yo mété on résèpsyon a ti bwè ti diskou é ti pètifou atè pou flaté «une Grann Dam é tout la litératur du péyi...», é yo kriyé lé média.

Bel pawol... la Kondé ja fout plen épi sa! Apenn tèt touné i viré ba RFO on interviou pou di fondkè a'y.

Ofisielman, i malad, i tou sel si lilèt, kidon fo'y alé. Mé piti a piti, MC fin pa di si i ka tounédo, sé kè moun an péyi-la engra é aryéré, é sé chef-la ka mal konswa. Si'y rivé maké tousa liv antiyè, sé tè-la, lanmè-la, sé pyébwa-la, van-la é tras a zansèt a'y ki bay enspirasyon. Moun o péyi? Yo pa pòté'y mèwd. Ahak! E pouki sé sa yo fè'y? Padavwa lespri a'y lib, lisid é kritik!

Mé moun o Zantiy sé on ras doudou-o-paradi ki toujou an kiou a pasé a yo, ki pè, ki ka méfyé-yo dè nouvelté kréyatif. Zot sav, toupannan sé spò, chanté é mizik nou ka tann palé, on paket servo sèryé annou ja chapé kò pou sèvi é réyisi ayè... Afout! On lit dlo pakay adan on ti tas. Mé ofet - Zobel, oti'y pasé?

Jean S. Sahaï

Voir l'article en français sur les adieux de Maryse Condé

Pages