Accueil

Yo Osélélé…

Hector Poullet
Yo Osélélé…

   Yo bon détwa i ja chapé -monté an Galilé, yo an péyi a moun san chapo é nou, nou toujou la ka kontinyé goumé-la. 

   Mé, nou ka vwè nou pa onlo ankò.

   Ki sé Jean Bernabé, Guy Hazaël-Massieux, Pierre Vernet, Pierre Pinalie, Jo Clémence, Sony Rupaire, Dany Bébèl-Gisler, Donald Colas Jolivière, Germain William, Auguste Bazerque, Rémy Nainsouta…é dòt ankò, yo bon enpé ja lagyé-nou.

   Dènyé la i pati-lagyé nou la sé Jean ! 

   Kréyòl, pou yo, a pa té anni on lang ou ka étidyé pou konpwann on tèknik lengwistik. Pou yochak, a nivo a-yo, kréyòl té dabòpouyonn moun, on pèp-moun ka palé on lang anbajouk yo kriyé kréyòl.

   Sé sé « militan » kréyòl-lasa nou ka pèd jou an jou. Asiré jòdila kréyòl-la rantré an lékòl-la. Asiré tini moun plen diplòm, Capès é kisisayésa, dèmen Lagrégasyon kréyòl. Mé ka yo ka pwodui ? Ki goumé yo ka goumé pou kréyòl pa dékréyolizé, pou pèp kréyòl rivé vansé èvè tout pèp si latè ? Dotwa jis wont mo « kréyòl »-la limenm a-y, yo ka ba lang an-nou tout kalité non : Lang-Gwadloup, Cikam ! Yo pa ka konpwann tousa ka divizé-nou ka fè nou pli frajil é sé sa kolonnizatè bizwen, fè sé pèp-lasa fonn kon sendou an sòlèy !

   Kidonk, sé militan an-nou i ja pati la, lésèz yo ja monté an Galilé la, fo-nou gadé-yo Osélélé !

   Mé ola sa yé Osélélé ?

   Sé andidan nou chak, adan Sonjé an-nou Osélélé yé. Annou sonjé-yo, palé di-yo, li é wouli-yo pou ba lajennès lanvi é gou pou yo kontinyé goumé-la.

   Mwen sé jou-lasa an ka li Jean Bernabé, on liv an pa té ni tan li lè i té vivan èvè-nou : Précis de syntaxe créole. On liv Afarèl rédé mété dèwò adan « Guide de Langues & Cultures créoles » aka Ibis rouge éditions.

   Mèsi Afarèl !

    Mèsi Jan ! 

   An toujou di ou té on Jehan, nou ni pou nou monté asi zépòl a-w si nou vlé vwè pli lwen.

Pages