Adan ki kalté lavi nou rivé a ? Pèsonn pa ka respekté ayen ankò ek pèsonn pa ni respektasion ba pèsonn ankò. Kon nou pé wè anlè vidéo-a ki pli ba-a, an met-lékol ka chaché opozé an zélev terbolizé an lot, mé ti boug-la pa fè ni yonn ni dé, i lévé lanmen anlè met-la ! Pli mové : olié sé lézot zélev-la té mandé kanmarad-yo a sispann fè vakabonnajri, yo koumansé ka ri ek ka djélé konsidiré yo té kontan wè goumen-tala.
Pli mové ankò : lè jenn ti sakaboy-la fouté met-lékol la atè, ni pliziè zélev ki batjé adan ladjè-a ek ki koumansé ba met-la kou tou. San menm palé di sé tala ki té ka filmé ispektak-la épi téléfòn powtab-yo. Dayè, sé yonn adan sé gran sinéas-tala ki difizé vidéo-a nou pé wè a. Jòdi-jou, fè lékol vini konsidiré sé karaté oben laboks ou ka fè. Fok ou atann kò'w ki nenpot lè an zélev pé bouré'w oben fouté an kout tjok.
Ki sa ladministrasion lékol-la ké fè zélev-tala ek sé ti konplis-li a ? Pétet yo ké ba yo dé jou déwò, men sé ti misié-tala dwet bien sanfoutépanmal pis pa menm paran'y, i dwet pa ka respekté non pli. Dèmen bomaten, yo ké ladjé lékol ek sé yo nou ké wè anlè jounal oben latélé, ponyet-yo maré épi minot, davwè yo konmet tjek salopté. Sé tout sosiété-a ki ka pati tjou-pou-tet, ki ka kalpaté nan razié toubannman es pies nonm oben fanm politik pa ni tjek solision pou sa rézoud poblenm-tala...
Commentaires