Sé jou tala, nou la ka viv an mové mové mové pass ki ka fè, nou pa ka menm sav ki jou nou yé, ki jou ki ki jou. Almanna a ki almanna a pa ka menm fè nou sav ki jou nou yé, afoss chak jou ni menm fidji a : sé lévé épi rété andidan. Tan an ka pasé alé, épi menm trentren an ki ka di nou : rété lakay nou. Finett wouvè asou lavi andéwò a, bagay la toutt moun ka kriyé latélé a, ka pòté ban nou toutt sé lo nouvel flipan an, éti ou ka tann mové lavanniz ki ka tonbé oliwon Latè, ka kontinié fè nou konsidiré Latè pa Latè, oben Latè la ka tounen fol, i za la ka tounen an manniè bankal afoss moun ka tonbé kon mouch. É sé jistiman pass nou poko présé pou sa, é menm si sé pa ni mess nou, ni kilti nou, fok nou pran distans nou épi toutt moun, pa bo moun, pa ba moun lanmen, chak moun lan rété an plass li, rété lwen moun, akwèdi nou toutt la nou annou vini konparézon toubannman. Sé pass tala ka chonjé santé’y, pass i ka chonjé santé lott la, ki fok nou toutt ansanm nou pou fè menm jess la. Pran distans nou. Rété bòkay nou manmay, sé rimed la, annou atann lavi viré pran labitid li. Sé sa ki za kay koumansé ban nou an chans fè mové malva tala pran lanmè sèvi savann, menm si jik jou, sé pa li ki ka vréyajé, sé nou ki ka ba’y lanmen, ek toutt chans li vréyajé. Nou sa respekté kònou. Annou respekté’y, avan sé pa jandam ki vini koumansé fè nou konnett, oben ban nou an ti lapèsi pri lavi pé kouté épi an bel kontravansion. Tjenbé red.