Lot jou, té ni on bel sanblé a Konkakaf an péyi Gwadloup. Jack warner, ki sé met a mannyok a Konfedérasyion a Foutbol La Karayib, désidé fé 31é konsit a yo an Gwadloup. Lé an rivé andidan sal-la, ola sa té ka pasé an rété soté .. té ni onlo responsab a foutbol la karayib, men yo chak té mandé mété drapo a péyi a yo.... sé anki Matinik , Gwadloup é Giyan, ki té sizé anba drapo fwansé.
Zafè a drapo-la, sé on bab, lanné pasé, lé ekip foutbol Gwadloup, ay jwé adan Gold cup-la,onlo péyi la karayib, di yo pa dakô, gwadloup vin jwé épi drapo a fwansé. Alos Gi Rok prézidan a Lig a foutbol gwadloup, touvé on mwayen pou mawonné bab-la sa. I vini épi on drapo, ki jôn wouj é vet, men i ka di a pa drapo a peyi Gwadloup, men drapo a ékip foutbol-Gwadloup !
Men tout moun sav dèyé sa, ni on gwo poblém politik, nou sé on peyi la Karayib nou pa endépendan, nou an ba jouk a fwansé, tankou, alos fwansé ka oblijé nou sèvi avè drapo a yo
Konmen tan sa ké diré ? jikatan Gwadloup ké kaskod ? dapré sa moun a konkakaf ka di,si yo réisi fè gwadloup rantré adan konkakaf, sa ké vlé di péyi an nou kay vi on nasyon .. a foutbol. !
Men an nou pofondé kalkilaj-la ,zafè a drapo-la, sé on gro bab ; mennsi dé serten politisyen ka fè dèyé pou pa vwè sa.
Lot jou Viktoren Lirel,prézidan Rejyon Gwadloup, té organizé on sanblé a sa yo ka kriyé « Region ultrapéripheriques Européennes » » ; ki vé di péyi okn tel Gwadloup, Matinik, Giyann, men osit Madè, Asor,… e ka nou vwè ? tou sé ti péyi-la ki té an ba jouka peyi kon lespagn, potugal, yo genn drapo a yo, sé yenki nou ki rété an ba drapo a fwansé ankô.
Pouki ?
Sé pou sa dépi an I963, lé pèmyé patriyot gwada, koumansé pozé poblem a nasyion gwadloup, yo fé on drapo wouj vet, , blan é pi on zetwal , on drapo ki té ka sanm ta Kiba, oben ta potoriko, sété drapo a GONG.
An I978,IPLG meté on dot model drapo dèwô, epi sé mennm koulè-la..
An I981 MPGI li osit mété on drapo dèwô, é i ajouté on bann nwè ladan’y
An I997 on dot organizasyon nasyonais, KLNG woupwan lidé a. drapo wouj vet,nwè é wouj...
Kifé pèp annou ka koumansé abityé épi se model koulè-la sa..
Men léw k a gadé istwa a peyi gwadloup fon ou sonjé lé Inyas, konbata doubout kont esklavajis fwansé, met an wout kont lawmé fwansé, sé drapo wouj i mété an lè..
Ti tak pli ta ; an I804, lè pèp Ayiti, lévé gawoulé kont fwansé, yo pwan drapo a fwansé yo chiré blan- la é yo gadé dé koulé, wouj ak nwé.. yo rélé yo pa lé drapo blé blan wouj, és a pa chimen–las, nou dwet pwan ?
Danik I. Zandwonis
Commentaires