Anba lalin klè, lakay Man Doudou an sel tiré kont.
Man Doudou : Mété tab-la asou koté ! Tiré chez-la !... Yé krik !
Ti Jan : Yé krak !
Man Doudou : Yé mistikrik !
Ti Jan: Yé mistikrak !... Mé, Man Doudou ! tout moun pòkò la ! Bondjé…
Vwa Bondjé (psalmodiée) : Menm lè Bondjé pa la Bondjé la !
Man Doudou (se signant) : Amen !
Ti Jan : Bef, ola i yé ?
Man Doudou : Pa chaléré kow ! Oswè-a, sé pawol-la ki wa !!... An tan djab té ti bolonm, Misié
Bondjé té lé neg danmé ba’y an chimen.
(Dans une niche, apparition de Bondjé)
Bondjé : An gran chimen pou lé sen ek lé zanj pa rivé lakay-mwen épi labou anlè soulié-yo.
Man Doudou : Mé, an tan-tala, neg té ka di : “ Patwon, nou pa sa travay si tanbou pa ka bay
lavwa »… Mi bab ! Adan péyi-a, té ni an sel tanbou.
Koulibri : Tanbou-tala, sé té tanbou léritaj zanset-mwen !
Man Doudou : Bondjé di konsa
Bondjé : Chouval monfi, ay wè Koulibri épi ou a mandé’y prété’w tanbou’y la (en a parte) Prété !
(ricanements) Lè man ké trapé bet-la, kwik ! Twop boudoum boudoum an zorey-mwen ! Epi tanbou
ka palé palé djab !
(Tambour ladja dans le lointain)
Bondjé : An ! Kouté sa !... Zot tann !... Chouval monfi, ay wè Koulibri épi ou a mandé’y prété’w
tanbou’y la !
Chouval : Mé, patwon… sianka i pa lé ?
Bondjé : Démantibilé’y fout !
Man Doudou : Chouval pati-alé plakatak plakatak plakatak !
Chouval : Bonjou Koulibri !
Koulibri : Bonjou Chouval !
Chouval : Bondjé met-mwen ka mandé’w prété’y tanbou’w la.
Koulibri : Dépi ki tan Bondjé ka bat tanbou ? I pa wè’y pies !
Chouval : Pengad konpè ! Lè Bondjé lévé faché…
(Bruit du tonnerre simulé par Bondjé)
Koulibri : Kouri di met-ou sel manniè pou i rivé trapé tanbou léritaj zanset-mwen, sé koupé fok i
koupé tet-mwen !
Chouval : Badjolè ou badjolè ! Man ké dépotjolé’w !
Koulibri : Kapolad frè-mwen ! Bat tanbou-a ban mwen !
Man Doudou : Alos kapolad janbé tanbou-a : boukoutouk boukoutouk boukoutouk ! Sabo Chouval
sé té an sel nich zéklè… Koulibri tounen-viré lantou Chouval épi zip zip !
Chouval : Wayayay ! Man koki ! Koulibri krévé zié-mwen !
Bondjé : Tonnè di sò !...Bef, filé kòn-ou! Fann kann épi viré pòté tanbou-a ban mwen !
Man Doudou : Bef mandé Koulibri tanbou-a. Koulibri pa menm pran lapenn réponn . Tanbou
wouklé ! Koulibri pran lavol. Bef ralé koy asou koté. Koulibri plonjé anlè Bef zip zip ! An sel fènwè
anni vlopé monbet ad vitam éternam!
Bondjé : Man key dékalé’w, ich Man Bans !
Man Doudou : Padon Bondjé ! mé… jouré adan bouch Bondjé, sa pa djè bel !
Bondjé : Eskizé ! (il saisit un pistolet qu’il arme)
Man Doudou : Apré Chouval, aprè Bef, pou rapé tanbou-a, Bondjé vréyé Pwéson-Armé, Chatou,
Matoutou-falez, Sèpan, Rat, Ravet, Mayengwen, Yenyen… Yo tout la viré lakay Bondjé…bèkalo !
Bondjé (descendu de sa niche) Chouval, vansé fout ! (il enlève de son visage un masque doucereux,
qui révèle un autre grimaçant, brandit son pistolet) Hue dada !
Man Doudou : Koulibri, Kapolad épi Tanbou mawon ek an gran van-an chayé yo anba granbwa…
Sé té transbòdaj kont tradisionnel la Poutji kapolad pa ni latjé.