HAAAA ! PAPAN MWEN !
Lè nou té piti, ou ban nou on édikasyon ki rèd !
HAAAA ! PAPAN MWEN !
Lè jou rouvè, ou ja an jaden,
Maré bèf, planté patat, fouyé ziyanm sé-w !
HAAAA ! PAPAN MWEN !
Mi solèy ja pété an syèl !
Ou ka sonjé dépann ti koko alo, pou-w viré déjiné !
HAAAA ! PAPAN MWEN !
A penn ou fè on pijé zyé,
Fo-w lévé kloué dé planch,
Kolé on soulyé,
Woop ! Lè-la ka kouri si-w !
Fo-w viré dèyè bèf é ba kochon manjé !
HAAAA ! PAPAN MWEN !
Avan-w désann ou ka tjouyi mango, malaka,
Koupé é pliché kann;
Sé ti-moun-la ké kontan !
Han ! Mi gwo kato ja ri-w !
HAAAA ! PAPAN MWEN !
Ki lajouné, ki lannuit, fo-w chayé pitit aw,
Ki pou amizé, ki pou yo travay !
HAAAA ! PAPAN MWEN !
Jodi jou, pou tousa ou ka fè :
Tout pitit a-w, ki timal, ki tifimèl !
Nou ka di-w mèsi onpil,
Pas nou enmèw onchay !
{{Sandhya Féras-Gourdine}}