Yo ka di'w ki yo pa sa penyen kò-yo bien pas yo pa ni bon pwodwi ek machin pou féré chivé. Men, yo ka bliyé di'w ki yo ped labitid otjipé kò-yo di chivé-yo yo menm. Menm si yo ni tan pou fè'y sé jou-tala, yo ped gou pas kwafez-yo a ka mantjé yo.
I jis ni ki ka di'w ki kwafez-yo ka mantjé yo plis ki doudou-yo. Fok di ki nou ni labitid alé kay kwafez-nou lè nou anvi ek nou ka pasé bon moman épi yo pas la ni an bon lanbians : ni bon mizik, tala ka rakonté tout lavi'y bien fò pou tout moun tann, oben ti-bébé ka anmizé pandan tan yo ka penyen maman-yo. Ou ka menm rivé vini zanmi épi dé moun ou toujou ka jwenn la. Kwafez-ou a ka bien lavé tet-ou ek i toujou paré pou fè'w ri ek mété'w bidjoul. Si ou té rivé chimérik lakay kwafèz-la, ou ka viré pati épi bon kouraj.
Fok di ki sé an travay ki pa flouz pas fok ou enmen sa pou ou sa fè'y pannan pliziè lanné. Ou doubout tout lajounen ek délè, sé kliyan-an pa paré pou atann, oben konprann ki ou pé pa fè an mirak épi tet-yo. Délè, yo anvi sanm an moun yo wè latélé oben anlè Enternet, ek kwafez-la ka di yo ki sé an mové lidé, pas yo key led épi sa an tet-yo. Yo ka anrajè ek fok ou fò pou ou pé sa sipoté bagay-tala. Fok ou ni pasians kité pasians ka alé.
Menm si ou sa penyen, ou pé pa rété la épi di konmkwa ou sé an kwafez pas sé an vré travay ki la. Ou pa ka vini kwafes kon sa. Fok ou alé lékol pou aprann fè'y pas ou pé pa fè nenpòt ki sa épi tet an moun.
Nou ka chonjé tout sé kwafez-la ek nou ka di yo ki nou pa ka blié yo. Dépi nou key pé sòti, nou key viré pran labitid alé wè yo pou yo sa otjipé di nou an manniè nawflaw. Fos épi kouraj ba yo, ek mèsi anchay !