Accueil

Mi nou bèkèkè an péyi-la

Max Rippon
Mi nou bèkèkè an péyi-la

Antra graté nou asi fal kon kochon-planch

Antra fè nou pran sonmèy afòs dousiné nou an do

Nou pa prangad

Antra monté si nou kon tik anrajé

Souvant fwa padon géri bòs é nou konprann lavi dous

Nou aprann lang a yo an lékòl a yo

Antra pa ka lésé mès a yo trenné pou nou trapé

Nou mayé èvè yo san pran tan konnèt aki yo

Jòdijou nou bèkèkè an kat-chimen kon sèwvolan ki pèd ké

Mi nou sizé si talon douvan ravin ka chayé dlo-pléré alé

Antra fè nou akwè sé chivé lonji ka konté

Nou rabouté chivé grenné dépasé kannal a fès pou nou trapé bèl figi

Nou graté sousi alantou a zyé pou mèt dékalkomani

Nou goumé pou sanm antra

Mé antra savé triyé farin é sann an tré

Nou fè fon asi yo pou montré nou lawout

Mé Antra wé kon wé fèt

Lésé nou ka tété lalwé…

Nou pa té savé kijan yo pyad

Yo pléré zyé sèk si zépòl an nou

Nou savé nou pa koken

Nou péyé antra frékantasyon

jòdijou nou ka hélé

Anmwé rat an sak-a-pen

Nou ka pléré gwo-dlo an mitan lankongni

Antra mayé èvè sésé kouyonné bònanman

Rété épi dada pou lak a tè é bownaj imòwtèl

Antra vin baré chimen ka menné bouva bwè an ma

E nou sizé bwa kwazé ka èspéré antra chanjé mès an péyi an nou …

Pages