Alor ki liver pe instal li dousma dousman dan nou rezion, nou pei pe fer fas ar enn defisit inportan dilo dan rezervwar prinsipal pei, La Mare aux Vacoas, ki fourni dilo Plaines Wilhems e bann rezion avwazinan. Depi plizir mwa, CWA pe aplik enn politik drastik dan fournitir kotidien dilo a tou bann konsomater dan rezion Plenn Wilhems. An mem tan, minister Linfrastriktir piblik finn aloue kontra pou koumans travay ki pou permet Mare Longue fourni dilo la Mare aux Vacoas. Nou pa kone si problem-la pou termine kan Mare Longue pou koumans fourni dilo la Mare aux Vacoas, nou kone selma ki pri dilo pou ogmante, non parski finn ena sa bann travay-la pou fer, me parski, dapre Dr Beebeejaun, pri konsomasion dilo pa finn ogmante depi plizir lane. Dr Beebeejaun pe mars lor enn lakord red parski so desizion pou enn ogmantasion pa pou pase san kree problem. Me kouma touletan finn fer, Dr Beebeejaun kapav desid larg dilo forfor kan Mare Longue pe ranpli Mare aux Vacoas. So logmantasion kapav lerla pas pli fasilma.

Nou pei finn experimant enn long peryod lasesres kouma nou finn trouv li osi dan bann pei dan nou rezion e plizir pei dan lemond. Lasesres li enn explikasion, me nou pei pandan peryod lapli pa finn ena enn politik konservasion dilo lapli. Nou nek fie bann rezervwar. Kouma nou kamrad Narain Subrun finn deza explik li dan son lartik « Rain Harvest » ki Lekolozis ti pibliye dan nimero 15, nou bizin devlop sa politik ramas dilo lapli-la. Lor 2200 mm dilo lapli par an, laplipar al dan lamer. Rodrig plis develope ki Moris lor ramas dilo lapli. Saki gouvernman finn fer pou bann fami morisien itiliz lenerzi soler, li kapav fer li pou met an plas enn fond ki permet sak propriyeter enn lakaz met dalo pou ramas dilo lapli ki kapav servi pou twalet, arozaz, netoyaz lakaz, lavaz loto etsetera. Nou swete ki Dr Beebeejaun travay lor sa propozision-la, apar bann lezot soz lor ki bizin osi travay kouma lor enn letid ki sekter prive ti fer an 1975 lor dilo souterin ki al fini dan lamer. Moris pena drwa pena dilo.