Bondié sanblé tout bet ki ka brè dlo. I di yo, fok zot fouyé ma pou ni dlo tout tan, pas karenm-lan ké pli red chak lanné.
Pres tout bet réponn, yo ké vini fouyé ma.
Pilipipi !
Wé !
Nou ké fouyé ma !
Wé !
Pilipipi !
Wé !
Nou ké fouyé ma !
Wé !
Pilipipi !
Wé !
Nou ké pé bwè dlo.
Wé !
Pilipipi !
Wé !
Menm si sé karenm.
Wé !
Pilipipi !
Wé !
Nou ké fouyé ma !
Wé !
Pilipipi !
Wé !
Ké ni dlo tout tan.
Wé !
Pilipipi !
Wé !
Ba bet ki ka brè dlo
Wé !
Pilipipi !
Wé !
Nou ké fouyé ma !
Wé !
Pilipipi !
Wé !
Nou ké fouyé ma !
Wé !
Chien di : " Mwen ké vini, mé mwen ké ni an ti rita".
Poul di : "Mwen ka vini mé, épi tout pitit-mwen dèyè mwen."
Lapen di : "Mwen ka vini pas tout moun ka di " Poule boit pisse pas, lapin boit pas pisse ". é sa pa vré. Mwen ka brè, anchay menm" é mwen ké ni bizwen dlo ma-a.
Milé di : "Mwen ka vini, pas mwen sé chef sendika, mwen la pou véyé lè-a. Lè i midi fann, mwen la pou kriyé Hi ! Han ! Hi ! Han ! Tout moun lan pou kité travay".
Koulibri di : "Mwen ké la, tout tan soley ka kléré. Mwen lé manzè lalin wè mwen ka travay. Mwen lé manzè lalin wè ki manniè mwen vayan, mwen ni kouraj an travay. Mwen lé i wè, anba soley ki ka pété difé, ki manniè mwen ka abiyé bel. Ki manniè mwen bodzè é rad-mwen ni anchay bel koulè. Ki manniè mwen ni anpil ganm ek lentérésan an zafè-mwen."
Manmay, zot pa konnet nouvel-la ?
Ében, mwen ké di zot !
Es zot sav, Koulibri enmen manzè lalin. An ti manzè ki ni an ti koulè
wayayay,
an ti koulè sové épi, konparézon kon pa ni.
I bizwen mandé'y mayé. I pa sav ki manniè pou i di'y sa.
I pa sav si sé an fransé si sé an kréyol pou'y di'y sa. Zot ja sav. Fransé'y
Kout kon latjé krapo.
Ki konsey zot té ké ba'y ?
Palé ba ti madigwàn-la, an fransé oben an kréyol ?
Mwen pa ka tann !
An fransé oben an kréyol ?
An kréyol ?
Ha ! An fransé ?
Gògò di : "Janmen i pa ka vini fouyé ma !
Janmen i pa ka vini mété lanmen'y adan latè, adan labou ba pèsonn.
Pa menm ba Bondié menm si i vini mandé'y sa an persòn.
Janmen i pé ké vini sali bel plim-li.
I pé ké vini sali bel pat jòn-li a, bel bek long li a.
Janmen !
Janmen, Bondié, padon Bondié !
I pé ké vini sali kò'y adan an ma labou".
Gògò sé an zwézo long.
Zel-li ron, latjé'y long ka fè pliziè lépésè.
Bek-li gro pa toutafetman ron.
Anlè do'y i ni an koulè brun ka tiré anlè gri, gri sann.
An tach nwè ka sòti dépi zié'y rivé jik dèyè tet-li.
Lè Bondié tann sa, i di :
"Tanto, tanto !
Bef pa ka ni bizwen latjè'y an sel fwa.
Moun pa janmen pou di : Jamais fontaine,
je ne boirai de ton eau".
Toupannan tout moun ka fouyé ma-a, yo ka chanté :
Mi an joli ma manmay, nou la ka fouyé la a.
Manmay !
Sé sa ki bel manmay, lè nou ka travay ansanm.
Manmay !
Mi an joli ma manmay, nou la ka fouyé la a.
Manmay !
Sé sa ki djok manmay, lè nou ka antann.
Manmay !
Mi an joli ma manmay, nou la ka fouyé la a.
Manmay !
Lé nou mété manmay, tout tet la
anba menm bonnet-la.
Manmay !
Mi an joli ma manmay, nou la ka fouyé la a.
Manmay !
Sé konsa manmay, pou mété péyi-a doubout.
Manmay !
Mi an joli ma manmay, nou la ka fouyé la.
Manmay !
Annou bliyé manmay, sa ki pa lé travay.
Manmay !
Mi an joli ma manmay, nou la ka fouyé la a.
Manmay !
Ladivizion manmay, i ké toujou ni sa.
Manmay !
Mi an joli ma manmay, nou la ka fouyé la a.
Manmay !
Pawol pa dèyè, manmay, ké toujou ni sa.
Manmay !
Ma fouyé.
Jou pasé.
Mwa pasé.
Soley koumansé chofé.
Karenm ka rivé, lapli pa ka tonbé pies.
Tout zeb ka vini sek. Dlo koumansé vini ra. Ma-a plen dlo. Tout moun ka alé brè dlo adan'y.
Gògò limenm swef dlo. I swef dlo kon an tou sab. I swef dlo, kon roch-fè adan an lariviè sek. I swef dlo, kon pen rasi adan basin pou fè bouden blan ek bouden nwè.
Gògò swef dlo,
kon pa ni. I pa fouti alè brè dlo adan ma-a.
Gògò swef dlo.
Lapli pòkò ké tonbé pies sé jou-tala.
Gògò swef dlo.
Pa ni an ti rouzinen, pa ni an ti larouzé. pa ni an ti pisa krab.
Gògò swef dlo
Pa ni an ti lapli moun mò,
Pa ni an ti fifin lapli,
Pa ni an ti lèrestan séren, bonmaten bonnè, pou i rivé brè ansel ti gout dlo
anlè an fey zeb chapantié.
Gògò swef dlo.
Gògò ka di kò'y : "Comme Dieu m'entend
parler, mwen simié pa sòti la épi mò la,
red,
net,
pasé mwen alé bwé dlo yo a,
adan ma yo a.
Adan ma dlo sal yo a.
Mwen Gògò, ou wè mwen ki la a,
Mwen rété ankò tibren kaka-bò-zié (dignité).
Mwen ké alé bwè, pito, adan ti grenn dlo sal, lariviè klordékoné a.
Pasé mwen alé flaté moun,
pou bwè dlo ma-yo a.
Dlo lentérésan-yo a. Dlo lapopagann-yo a.
Dlo lapolitik-yo a."
Sé pou sa, dépi jou-tala, Gògò pa ka bwè dlo ma.
Sé dlo lariviè selman i ka brè.
Serge RESTOG