Man té ka travay épi Maksimilien LIMINO. Misié, sé té an pwofésè yo té sispann pou senk lanné, davwa i té kasé tet an ti manmay épi an kou banbou.  Ann atandan, i té ni an ti boutik pou’y té genyen lavi’y. I té ka vann laglas épi limonnad.

An tan-tala, man té ka dòmi adan an chanm, an lakou boulanjri misié-tala. An jou, man té dèyè an kamiyonnet épi Pol Rétjen (non’y pou-tout-bon, sé té Pol Ansèn). Nou té ka rantré. Oliwon 500 met asou lanmè-a, man wè an boul difé ki ka klinioté. Mwen lonji dwet asou’y, pou té montré Pol li. I di mwen pa fè sa, sé an volan !

Lè minui pran, man tann bloblo asou lapot-mwen ! Sé volan-an ki té vini dèyè mwen, é i té ka konyen lapot-la pou’y té rantré.  Man té pè, pè ! Man ké di zot sa ki zot pé key konprann ! Si lapot-la té mal fèmen, man té  ké pri jou-tala ! Man té ni an matla asou tab-la, man mété’y asou mwen. Volan-an rété inè-di-tan jou-tala. Jou wouvè, man pa rivé pran sonmey pies !

Lè landèmen, man di LIMINO sa, i pa réponn mwik ! Sa fet pannan twa jou, é misié pa janmen ba mwen an solision. Twaziem jou-a, lè’w tann katrè di-maten, man pati Sentàn pou rivé Sen-Franswa a pié. Man té ka kouri, maché, viré kouri… Man rivé kay manman-mwen a sizè-di-maten.

Témwaniaj misié Vensan Sentkwa, Sen-Franswa (Gwadloup). Sé man LEPRIX ki matjé teks-tala. Maws 2014.