Accueil
Aimé CESAIRE
Frantz FANON
Paulette NARDAL
René MENIL
Edouard GLISSANT
Suzanne CESAIRE
Jean BERNABE
Guy CABORT MASSON
Vincent PLACOLY
Derek WALCOTT
Price MARS
Jacques ROUMAIN
Guy TIROLIEN
Jacques-Stephen ALEXIS
Sonny RUPAIRE
Georges GRATIANT
Marie VIEUX-CHAUVET
Léon-Gontran DAMAS
Firmin ANTENOR
Edouard Jacques MAUNICK
Saint-John PERSE
Maximilien LAROCHE
Aude-Emmanuelle HOAREAU
Georges MAUVOIS
Marcel MANVILLE
Daniel HONORE
Alain ANSELIN
Jacques COURSIL

Zo a Richepance pa tini hak a fè adan péyi an nou !

Zo a Richepance pa tini hak a fè adan péyi an nou !

 

    Davwa yo pa ka giè montré timoun an nou istwa a la Gwadloup lè zot vwè yo lékol, tini on paket moun ki toujou pa sav ki moun jénéral Richepance té yé. Boug-lasa sé li Napoléyon Bonapat té voyé pou woumet lesklavaj adan péyi Gwadloup piskè, kon onlo moun pa savé non pli, la Révolision fwansé té aboli'y an 1793. Lè zot vwè révolision-la kalpaté, Napoléyon rivé pwan pouvwa-la é i désidé met chenn an pié a Neg on déziem fwa.

   Sé kon sa i té vréyé jénéral LECLERC, bofrè a'y, an péyi Sen-Domeng (ki yo ka kriyé Ayiti jod-la) pou i té jouké sé met-a-manyok révolision neg la kivlédi TOUSSAINT-LOUVERTURE é DESSALINES. Nan menm mouvman-lan, i vréyé jénéral RICHEPANCE pou fann ren a IGNACE, DELGRES é MASSOTO ki té ka menné révolision anti-esklavajis la. Malérezman kon Gwaloup sé on piti péyi, larmé fwansé rivé krazé larmé sé révolisonnè neg la tandiskè a Sen-Domeng, ki pi gran, LECLERC pwan on gwo défet. Lè 1é janvié 1804, jénéral DESSALINES pwoklamé lendépandans a Sen-Domeng é wouba'y ansien non amérendien a'y ki té "Ayiti" kivlédi "Péyi ki ni onlo montangn".

   Jénéral RICHEPANCE é twoup a'y konmet onlo biten séléra apré yo érisi gangné lagè-la. Yo pann Neg, yo néyé Neg, yo fiziyé Neg asi Plas a La-Viktwa Lapwent etc...Mé, jod-la, ka nou ka konstaté ? Kè dé istorien, misié BELLENUS é misié REGENT, ka pòté mannev pou anbéli imaj a RICHEPANCE !!! Yo ka fè konférans pou chèché démontré ki misié pa té okouran dè désizion a gouvelman fwansé é bla-bla-bla...

   Tou sa paskè yonndé Gwadloupéyen ki konsian té sanblé alantou tonbo a RICHEPANCE pou té ekzijé kè yo woté kò a misié adan péyi an nou. Adan on jes ki senbolik, yo té jis pété on pati a tonbo-la pou montré déterminasion a yo. Kidonk sé dé istorien-lasa ka fè sa yo ka kriyé "négasioniz" kivlédi yo ka mofwazé listwa é adan lwa fwansé la, lè ou fè sa pou istwa a Juif, lajistis ka kondané'w. Pa ekzanp, si ou vwè ou di oubien ou maké kè chanm a gaz pa jen ekzisté, onfwamenm yo ka halé'w douvan on tribinal é lé média ka dérayé'y.

   Men si ou di oben maké kè RICHEPANCE pa fè Neg gwadloupéyen pon méchansté, lwa fwansé a pa ka prévwa pon sanksion kont vou !...

Connexion utilisateur

CAPTCHA
Cette question sert à vérifier si vous êtes un visiteur humain afin d'éviter les soumissions automatisées spam.

Pages