Yo ka di Sokrat on grangrèk an tan lontan, té fè maké asi anho lantré a on kalité Linivèsité té ni an tan lasa a Delphes an péyi Lagrès : « konnèt vou, voumenm a-w ».
Ni on tan, lè dé nèg té ka kontré, dé nonm, dé fanm, on nonm on fanm, oswa lè on moun té ka rivé adan on sanblé, i té ka di : Lonnè ! épi lòt-la oben sé lézòt-la té ka réponn Respé !
Jòdi-la, sa on jan pasé dimòd é lonnè é rèspé vini on jan pou di on moun Mèsi pou sa ou fè, nou ka rèspèté-w !
Oswè-la nou ka di Lonnè é Respé Ba Silvyàn Tèlchid.
Vyé pawòl, mi sé sa ka rété-nou lèwvwè nou pa annéta rété doubout douvan boulvès a lavi. Menmjan pou di tousa ki fèt an lanmè a pa fòt a réken, vougaré lanati pou di-y i pa ka fè-nou pè é nou pé ké janmen mété jounou atè ni douvan lenjistis, ni douvan tigonnaj kèlkanswa la yo sòti, kanmenmsi sa té ké ta Bondyé.
Tout bèt jenné ka mòdé on tipawòl pou espliké, si tan-la maré sa pé sé davwa i jenné é kidonk i ni figi-la i ni la, on figi a on mové moun, oswa figi a on moun i kòlè.
Kimoun ka sonjé livènaj kréyòl ankò ? Asiré lajennès, ka touvé-yo adan boulvèsé trafalga linivèsité Lézantiy jòdi, pa janmé tann palé sa ! Asiré sa an kay di la ké sann on léjann ba-yo. An kay palé-yo on tan ola Linivèsité Lézantiy é Laguiyàn té anni on pongni-moun mé on pongni simans-lèspwa.
Douvanjou, on lavalas ka déboulé dépi anho on machann chabon ! Tout lannuit-la lapli-la bat tòl-la ! Loraj é zéklè déchikayé syèl-la. Van-la limenm a-y adan on kouskouri san papa ni manman, zaboka ka blayi atè-la, pyé fouyapen ozabwa. Pyé koko enkyèt, yo pa konnèt an ki sans pou yo mété fèy a-yo. Tout zozyo séré kò a-yo ankyèpa. Pon pipirit pa ka bay-lavwa. Asiré sé rivyè-la ka débòdé. On sòlèy tou kagou ka wouvè zyé asi on lanmè anboulvès. Adan radyo-la yo ka di nou an « vijilans zoranj ». Eben bon !
Vakans bout ! Tout lékòl wouvè pòt ! Adyé Pari-plaj, Datcha-plaj, Karu-plaj, Wozo-plaj, ki zélèv, ki fanmi zélèv, ki pwofésè é pwofésèz, toutmoun ka fè sak a-yo pou déviré asi ban lékòl. Blokis-loto asi chimen lékòl ka mètanwout.
